Tensioni në Orosh u përshkallëzua kur Hamza (Erzen) Uka dhe Julian Cumraku u izoluan në një banesë të braktisur, duke kundërshtuar me armë patrullën e parë të policisë. Sipas burimeve, të dy radikalët kishin humbur prej ditësh nga mbikëqyrja e strukturave antiterror, ndërsa kur u lokalizuan, refuzuan çdo komunikim me forcat e rendit, duke deklaruar se “Do luftojmë deri në fund…”.
Negociatat zyrtare të RENEA-s nuk dhanë rezultat, pasi nga brenda shtëpisë u kthye përgjigje vetëm me breshëri kallashnikovi. Pikërisht në këtë moment, policia kërkoi ndërhyrjen e familjarëve. Vëllai i Hamza Ukës tentoi disa herë t’i afrohej, me frikën se mund të qëllohej, por vetëm në përpjekjen e fundit ai arriti t’i fliste vëllait të armatosur, duke e prekur në pikën e dobët, familjen dhe djalin e vogël.
Fjalët vendimtare që thyen rezistencën e Hamza Ukës ishin: “Mendo për djalin… largo xhindet dhe mos e shkatërro jetën tënde”. Pas kësaj bisede, Uka dhe Cumraku hapën derën e banesës dhe u dorëzuan. RENEA gjeti një arsenal armësh, granata, municion dhe materiale propagandistike të ISIS, ndërsa të dy tashmë përballen me akuza të rënda për armëmbajtje, kundërshtim të armatosur dhe propagandë terroriste.
