Autoriteti i Mediave Audiovizive (AMA) ka vendosur një gjobë prej 100,000 lekësh për Radio Televizionin Shqiptar (RTSH) pas një incidenti në emisionin sportiv “Super Gol” më 7 nëntor, ku moderatorja Hygerta Sako dhe të ftuarit shfaqën sjellje denigruese ndaj futbollistit ganez Arnold Kwaku Siaw. AMA kërkoi gjithashtu ndalimin e ritransmetimit dhe heqjen e edicionit përkatës nga interneti.
Sipas vendimit të AMA-s, sjellja e moderatorës dhe e të ftuarve ishte diskriminuese dhe kishin elemente raciste. Gjatë emisionit, moderatorja kishte problem të shqiptonte emrin e Siaw, çka çoi në qeshje nga ana e saj dhe e të ftuarve. Situata u përshkallëzua kur futbollisti u shfaq në ekran dhe batutat e tyre aluduan në ngjyrën e lëkurës së tij.
Këshilli i Ankesave të AMA-s konstatoi se RTSH dhe pjesëmarrësit treguan sjellje denigruese dhe shkelën parimet e dinjitetit njerëzor dhe mosdiskriminimit, duke cenuar etikën e transmetimit publik. RTSH u caktua një përgjegjësi të shtuar për respektimin e standardeve profesionale, veçanërisht për programet me ndikim të gjerë.
Gjashtë anëtarë të AMA-s votuan në favor të gjobës dhe ndalimit të ritransmetimit, ndërsa një anëtar votoi kundër. RTSH dhe drejtuesit e emisionit mohuan akuzat, duke pretenduar se situata ishte rezultat i një defekti teknik. Moderatorja Sako argumentoi se nuk kishte pasur racizëm dhe se qeshja e saj ishte e lidhur me vështirësitë në leximin e emrit të lojtarit.
Reagimi i klubit të Burrelit, ku luan Siaw, e cilësoi incidentin si një akt turpërues bullizmi dhe nxiti kritika ndaj RTSH për racizëm. Siaw, që ka shënuar dy gola për skuadrën e tij, është një shembull i sfidave që përballen futbollistët me ngjyrë në Shqipëri, të cilët shpesh përballen me diskriminim në stadiume.
