Arrestimi i Erzen (Hamza) Ukës në Fushë-Arrëz riktheu në qendër të vëmendjes një figurë të njohur prej vitesh për autoritetet e sigurisë. Uka, ish-pjesëtar i forcave komando me misione në Irak dhe Afganistan, është konsideruar prej kohësh person me rrezikshmëri të lartë. Ai ishte vendosur nën mbikëqyrje që në vitin 2007 për shkak të shenjave të radikalizmit dhe kontakteve të dyshuara me ideologji të dhunshme.
Në vitin 2019, Anti-Terrori e arrestoi pas hetimeve që e lidhën me nxitjen e urrejtjes dhe propagandën me motive ekstremiste. Në rrjetet sociale ai publikonte materiale të natyrës radikale, përfshirë simbolika të ISIS-it dhe video në të cilat demonstronte teknika luftarake për të rinj, përfshirë edhe fëmijë, të cilët ai i trajtonte si “rekrutë të ardhshëm”. Këto pamje u bënë pjesë e dosjes që provoi prirjet e tij të theksuara drejt ekstremizmit të dhunshëm.
Në vitin 2020, Gjykata e Tiranës e dënoi me 3 vite burg për propagandë terroriste dhe mbajtje pa leje të armëve, ndërsa gjatë procesit Uka kërcënoi hapur prokurorin dhe gjyqtarin, duke treguar bindjen e tij të thelluar ndaj ideologjisë radikale. Arrestimi i tij i fundit, pas ngujimit 12-orësh dhe tensionit të krijuar në Fushë-Arrëz, sjell sërish në dritë rrezikun që ai përbën dhe mënyrën se si ish-komandoja ka përdorur aftësitë e fituara në ushtri për të trajnuar të rinj sipas modelit të grupeve ekstremiste.
