Pamjet janë nga vendi ku ndodhi atentati mëngjesin e sotëm në Lushnjë, ku shënjestër ishte Julian Sula, i njohur si rival i grupit të Aldo Bares. Ngjarja u zhvillua pranë stadiumit të qytetit, ku ndaj makinës me të cilën po lëvizte Sula u qëllua me armë zjarri. Ai mbeti i plagosur në këmbë dhe ndodhet jashtë rrezikut për jetën.
Siç shihet edhe në video, policia ka mbërritur menjëherë në vendngjarje dhe ka rrethuar zonën, duke nisur këqyrjen e provave dhe marrjen e dëshmive. Shirita sigurie janë vendosur në perimetrin ku dyshohet se kanë qëndruar autorët gjatë sulmit.
Ndërkohë, pak minuta pas atentatit, është gjetur një automjet i djegur në fshatin Lifaj, i dyshuar se u përdor nga autorët për t’u larguar. Hetimet vazhdojnë, teksa policia po punon për identifikimin dhe kapjen e personave të përfshirë në këtë sulm të radhës kundër rivalëve të grupit të Aldo Bares.
