Julian Shehu po konfirmon javë pas jave formën e tij të shkëlqyer në kampionatin polak, ku mbetet një ndër lojtarët më të spikatur të Widzew Łódź, pavarësisht se sezoni nuk po ecën sipas pritshmërive për skuadrën.
Mesfushori i Kombëtares shqiptare ishte sërish protagonist në ndeshjen e së dielës ndaj Korona Kielce, duke shënuar golin e vetëm për ekipin e tij në humbjen 1–3. Shehu realizoi në minutën e 49-të pas një goditje këndi, duke rihapur përkohësisht sfidën dhe duke shpërthyer në festë me gjestin e shqiponjës, një sinjal i qartë motivimi në prag të playoff-it ndaj Polonisë në mars.
Ky ishte goli i katërt për Shehun në këtë sezon të Ekstraklasës, duke e forcuar pozitën e tij si një nga pikat më të ndritura të Widzew Łódź.
