Një qytetar vlonjat i është drejtuar redaksisë së JOQ Albania me një denoncim shqetësues, duke treguar se si një punonjës i Bashkisë Vlorë po punon në kushte tepër të rrezikshme në urën e Mifolit, në Novoselë.
Siç shihet në pamjet e dërguara, punonjësi është futur me skavator brenda në shtratin e lumit Vjosë për të pastruar llumin dhe për të hapur rrjedhën e ujit, në mënyrë që të shmangen përmbytjet në zonë.
Kjo situatë vjen në një moment kritik, pasi vetëm një ditë më parë shkalla matëse e urës së vjetër të Mifolit u mbulua totalisht, ku niveli i ujit arriti në 8.3 metra, një nivel alarmant që rrezikon tokat dhe banesat përreth.
Qytetari që dërgoi videon thotë se punonjësi po rrezikon seriozisht jetën e tij, ndërsa shteti dhe institucionet i kanë lënë në mëshirë të fatit, të keqpaguar dhe të pambrojtur.
Mesazhi i plotë i qytetarit:
“Përshëndetje JOQ! Ju lutem publikojeni që ta shohin njerëzit se si një punëtor i Bashkisë Vlorë punon në kushte të tilla që mund t’i rrezikojnë jetën. Dhe në fund marrin vetëm 450 mijë lekë të vjetra në muaj. Faleminderit.”
