Mbrëmjen e sotme, në unazën e Pogradecit është konstatuar një situatë shqetësuese, pasi një segment i rrugës ka pësuar deformime, ndërsa mbi karrexhatë ndodhen objekte të rrezikshme që mund të shkaktojnë aksident në çdo moment.
Një qytetar, i cili pak më herët ka kaluar me motor në këtë zonë, ka shpëtuar pa u përplasur vetëm rastësisht. Menjëherë pas ngjarjes, ai ka regjistruar pamjet dhe i ka dërguar pranë redaksisë sonë, me qëllim paralajmërimin e drejtuesve të tjerë të automjeteve.
Sipas tij, në rrugë mungon çdo lloj sinjalistike paralajmëruese për dëmtimin e segmentit, ndërkohë që zona është edhe pa ndriçim, duke e shtuar rrezikun.
“Si jeni. Shikoni pak kryesore në Pogradec është shembur dhe rruga s’ka asnjë sinjalistikë që është e shembur. Një burim aksidenti i sigurt! S’është marrë asnjë masë,” shkruan denoncuesi.
Apeli shkon për autoritetet lokale, të cilat duhet ndërhyjnë sa më shpejt për të shmangur ngjarje të rënda rrugore dhe për të garantuar sigurinë e qytetarëve.
