Një video e publikuar sot në mëngjes, gjatë mbërritjes së drejtorit të KESH-it Erald Elezi dhe kreut të ARRSH-së Gentian Gjyli në GJKKO, ka ngritur pikëpyetje serioze mbi sjelljen e efektivëve të policisë.
Pamjet tregojnë dy zyrtarët e arrestuar në banesë teksa shoqërohen drejt gjykatës, por vëmendjen nuk e marrin të pandehurit, por disa nga policët që duken duke qeshur pa asnjë arsye të dukshme. Zgerdhime mes uniformave blu, sikur bëhet fjalë për një situatë të lehtë e jo një procedurë të rëndësishme penale.
Nga vëzhgimi i videos, krijohet përshtypja sikur të pandehurit janë aty thjesht “gabimisht”, ndërsa disa prej policëve shfaqin një sjellje që nuk i përshtatet aspak protokollit dhe seriozitetit të momentit. Për një shoqërim drejt GJKKO-s, pritet qartësisht që uniformat të jenë neutrale, të fokusuara dhe profesionale, jo të krijojnë atmosferë të çuditshme, sikur gjithçka po merret me sportivitet.
Ky episod ngre sërish debatin për standardet e sjelljes së efektivëve gjatë procedurave zyrtare dhe për mënyrën se si veprimet e tyre ndikojnë perceptimin publik mbi institucionet. Pamjet janë regjistruar sot në mëngjes dhe tashmë kanë vënë në qendër të vëmendjes një pyetje legjitime: pse po qeshnin policët?
