Një avion luftarak indian u rrëzua të premten gjatë një fluturimi demonstrues, përballë një turme spektatorësh në Dubai Air Show, duke shkaktuar vdekjen e pilotit të tij të vetëm.
Avioni HAL Tejas u përplas në Aeroportin Ndërkombëtar Al Maktoum, duke shkaktuar një shpërthim të madh dhe një shtëllungë tymi të zi. Policia, ambulancat dhe një helikopter shkuan menjëherë në vendngjarje, duke përdorur shkumë zjarrfikëse për të shuar flakët. Një automjet tip SUV me targa diplomatike indiane u pa në vendin e aksidentit, bashkë me policinë dhe personelin e emergjencës.
Forca Ajrore Indiane (IAF) konfirmoi aksidentin dhe njoftoi se piloti pësoi lëndime fatale. “IAF shpreh keqardhjen e thellë për humbjen e jetës dhe qëndron pranë familjes së viktimës në këtë kohë zie. Një komision hetimor po formohet për të përcaktuar shkakun e aksidentit,” thuhet në deklaratën e tyre. Autoritetet e Emirateve Arabe gjithashtu do të hetojnë ngjarjen.
Shfaqjet ajrore rifilluan rreth një orë e gjysmë pas incidentit, ku 'Kalorësit Rusë' fluturuan mbi vendngjarje ndërsa ekipet e emergjencës ende punonin.
Tejas është avioni luftarak me motor të vetëm i prodhuar nga vetë India, nga Hindustan Aeronautics Limited (HAL). Ky avion i lehtë pritet të forcojë flotën indiane, ndërsa Kina po zgjeron praninë e saj ushtarake, duke përfshirë forcimin e lidhjeve me rivalin e Indisë, Pakistanin.
Në shtator, Ministria e Mbrojtjes e Indisë nënshkroi një kontratë me HAL për blerjen e 97 avionëve Tejas për Forcën Ajrore. Qeveria indiane kishte nënshkruar një marrëveshje tjetër në vitin 2021 për 83 avionë të tjerë. Dorëzimet, të cilat priten të fillojnë në vitin 2027, janë vonuar kryesisht për shkak të mungesës së motorëve që duhet të importohen nga Shtetet e Bashkuara.
Një ditë para rrëzimit, Byroja e Informacionit për Shtypin e Indisë hodhi poshtë pretendimet e disa rrjeteve sociale se një avion Tejas kishte rrjedhje vaji gjatë ekspozimit.
Megjithëse pamjet tregonin lëng që pikonte, ushtria tha se ishte ujë i kondensuar, një procedurë standarde për avionët që operojnë në kushte lagështie, siç janë ato në Dubai. Nuk u bë e qartë nëse avioni në fjalë ishte ai që u rrëzua të premten.
