Aktori i njohur Kevin Spacey ka rrëfyer se aktualisht po jeton në lëvizje dhe po përpiqet të gjejë një mundësi për t’u rikthyer në industrinë e filmit, pas skandalit seksual që e largoi nga Hollywood për gati një dekadë.
Në një intervistë të gjatë për gazetën britanike The Telegraph, 66-vjeçari Spacey tha se situata e tij financiare “nuk është e mirë” dhe se aktualisht jeton në hotele dhe apartamente të përkohshme në platforma si Airbnb, duke lëvizur aty ku ka punë.
“Unë thjesht nuk kam shtëpi, këtë po përpiqem të them,” u shpreh ai, duke treguar se kishte humbur shtëpinë e tij në Baltimore për shkak të ekzekutimit të hipotekës.
Gjatë intervistës, Spacey u shfaq duke kënduar standarde në një klub nate në Qipro, larg dritave të Hollywood-it, ku dikur ishte një nga emrat më të mëdhenj të industrisë.
Spacey është i “non grata” në Hollywood që nga viti 2017, kur aktori Anthony Rapp e akuzoi për ngacmim seksual në vitin 1986, kur Spacey kishte 26 vjet, ndërsa Rapp vetëm 14. Një juri civile i dha të drejtë Spacey ndaj Rapp, por akuzat nxorën në pah pretendime të tjera për sjellje të papërshtatshme. Spacey ka pranuar se ka qenë “shumë i afërt fizikisht” dhe ka prekur dikë pa e ditur se nuk dëshironte.
Ai u krahasua me shkrimtarët që përjetuan periudhën e “Red Scare” dhe listat e zezë të Hollywood-it, duke shpresuar se një aleat i fuqishëm mund ta ndihmojë të rikthehet në skenë, siç ndodhi me shkrimtarin Dalton Trumbo falë mbështetjes së Kirk Douglas.
Spacey ishte pjesë e serialit të Netflix-it House of Cards kur Rapp bëri pretendimet, dhe më pas u largua nga projekti pas pretendimeve të tjera për sjellje të papërshtatshme. Që nga ajo kohë, ai ka pasur vështirësi për të gjetur role të profilit të lartë.
Aktori tha se vetëm një telefonatë nga një talent me famë, si Martin Scorsese apo Quentin Tarantino, mund ta rikthejë në skenë. “Do të jem jashtëzakonisht i nderuar dhe i gëzuar kur një nivel kaq i lartë talenti të më telefonojë,” shtoi ai, duke shprehur besimin se shfajësimi dhe rikthimi mund të ndodhi.
Pavarësisht akuzave, asnjë gjykatë penale apo civile nuk e ka gjetur Spacey fajtor për krime seksuale. Një gjykatë penale në Londër më 23 korrik 2023 e shpalli të pafajshëm për sulmin seksual ndaj katër burrave. Po ashtu, një prokuror në Massachusetts më 17 korrik 2019 refuzoi të ngrinte çështje ndaj tij pasi provat nuk ishin të mjaftueshme.
Gazeta raporton se një fans i Spacey në shfaqjen e tij në Qipro nuk ishte i shqetësuar nga akuzat. “Ai u shpall i pafajshëm! A nuk mjafton kjo?” tha ai.
