Shirat e vazhdueshëm gjatë ditës së sotme kanë mbajtur prurjet e lumenjve në qarkun e Fierit në nivele të larta, duke rrezikuar zonat përgjatë shtratit të Vjosës. Ndërsa në Memaliaj niveli i lumit ka shënuar një ulje të lehtë, situata në urën e Mifolit paraqitet alarmante. Matjet më të fundit tregojnë se lumi ka arritur kuotën prej 8.3 metrash, një rritje e dukshme që alarmon autoritetet dhe banorët e zonës.
Ekspertët paralajmërojnë se nëse prurjet vazhdojnë me këtë ritëm, niveli i lumit mund të rritet edhe më tej, duke kërcënuar jo vetëm tokat bujqësore përreth, por edhe banesat dhe infrastruktura të tjera në zonat e ulëta.
Autoritetet po monitorojnë nga afër situatën dhe u bëjnë thirrje banorëve të jenë të kujdesshëm, të shmangin zonat pranë lumit dhe të ndjekin rregullisht udhëzimet zyrtare për sigurinë personale dhe atë të pasurisë.
