Studimet më të fundit zbulojnë një hendek të madh mes dëshirës për pension të hershëm dhe realitetit ekonomik që po përballen brezat e sotëm, si në Europë ashtu edhe në SHBA. Ndërsa mosha ligjore e pensionit në Europë luhatet rreth 64.3 vjeç dhe në SHBA arrin në 65 vjeç, Gjenerata Z ëndërron të largohet nga tregu i punës përpara moshës 60 vjeç. Por parashikimet tregojnë se kjo gjeneratë mund të detyrohet të punojë deri në 67 vjeç, ndërsa millennials, Gen X dhe baby boomers pritet të pensionohen edhe më vonë, rreth moshës 69 vjeç.
Të dhënat e studimeve ndërkombëtare shfaqin një panoramë aspak optimiste. Një analizë e Pew Research Center tregon se mosha ideale e perceptuar për pensionim mbetet tek të 58-at, por inflacioni, rritja e kostove të jetesës dhe pasiguria ekonomike po e shtyjnë gjithnjë e më tej moshën reale të largimit nga tregu i punës. Sipas studimit të Kearney, 47% e europianëve dyshojnë se do të arrijnë një standard të këndshëm jetese në pleqëri, ndërsa mbi 60% e të moshuarve ndihen të pasigurt se do të ruajnë nivelin aktual të të ardhurave. Edhe më shqetësues është fakti se 41% e tyre presin të vazhdojnë punën edhe pas moshës së pensionit.
Situata në SHBA paraqitet edhe më e rëndë, teksa dy të tretat e amerikanëve e shohin të paarritshëm pensionin midis moshës 65–70 vjeç. Çmimet e banesave janë rritur me 50% që nga viti 2020, ndërsa shpenzimet ushqimore pritet të dyfishohen. Për më tepër, një në tre amerikanë nuk kursen asnjë dollar për pension, ndonëse edhe individët me të ardhura të larta po ndiejnë presionin e kostove të rritura. Në këtë realitet ekonomik të goditur nga inflacioni, borxhet dhe rritja e kostove bazike, pensioni i hershëm mbetet më shumë një ëndërr sesa një mundësi e prekshme për shumicën e brezave.
