Pas publikimit të një denoncimi nga një banor i fshatit Kutalli në Urën Vajgurore, i cili pretendonte se një ndërtesë trekatëshe po ndërtohet pa leje nga një person me emrin Jani Qendro, në redaksinë e JOQ Albania ka mbërritur reagimi i pronarit të objektit. Ky i fundit kundërshton akuzat dhe pretendon se ndërtimi disponon leje dhe dokumentacion të rregullt ligjor.
Banori i Kutallit, në denoncimin e tij të mëparshëm, u shpreh se kishte njoftuar disa herë policinë dhe institucionet përgjegjëse, por sipas tij nuk ishte marrë asnjë masë. Ai pretendoi se ndërtesa është pa leje dhe akuzoi autoritetet vendore se po mbyllin sytë ndaj situatës.
Ndërkohë, në një mesazh të ardhur në redaksinë tonë, pronari kundërshton denoncimin e qytetarit dhe pretendon se ndërtesa është me leje. Ai thotë se dokumentacioni është i rregullt dhe se punimet po kryhen në përputhje me ligjin. Pronari shprehet se, sipas tij, akuzat e denoncuesit nuk qëndrojnë.
Duke qenë se bëhet fjalë për pretendime të ndryshme nga të dyja palët, JOQ Albania publikon reagimet e tyre në shërbim të transparencës, ndërsa verifikimet u takojnë institucioneve përkatëse.
Redaksia jonë mbetet e hapur të publikojë edhe reagimin e radhës nga qytetari denoncues, nëse ai dëshiron të sqarojë më tej qëndrimin e tij.
