Gjykata e Posaçme ka vendosur dy masa sigurie për zëvendëskryeministren dhe ministren e Infrastrukturës dhe Energjisë, Belinda Balluku. Sipas vendimit të gjyqtarit Erion Çela, Balluku pezullohet nga ushtrimi i detyrës dhe funksionit, ndërsa i ndalohet të dalë jashtë vendit. Masa u mor pas kërkesës së prokurorit të SPAK, Dritan Prençi, nën hetimin për shkelje të barazisë në tendera.
Prokuroria e Posaçme ka regjistruar zëvendëskryeministren si person nën hetim për këtë akuzë. Hetimi lidhet me disa kallëzime penale, më kryesori i të cilëve është rritja me mbi 50 milionë euro e vlerës së kontratës për tunelin e Llogarasë me kompaninë fituese turke, pas dhënies së tenderit.
Belinda Balluku është zv. Kryeministre që prej korrikut 2022 dhe ministre e Infrastrukturës dhe Energjisë që nga janari 2019, ndërsa në zgjedhjet e 11 majit ajo drejtoi fushatën e Partisë Socialiste në qarkun Fier, ku PS siguroi 12 mandate.
