Media britanike ‘The Guardian’ ka shkruar për përgjigjen e kryeministrit Edi Rama ndaj ministres së Brendshme të Britanisë së Madhe, pas planit për dëbimin e 700 familjeve shqiptare. Polemikat janë përshkallëzuar mes Tiranës dhe Londrës, ndërsa në qendër të diskutimeve është politika e re e qeverisë laburiste për largimin me forcë të migrantëve që kanë dështuar në kërkesat për azil.
Sekretari britanik i Shëndetësisë, Wes Streeting, ka pranuar se nuk ndihet i rehat duke ndjekur politikën e deportimit, por thekson se kjo është “e duhur për vendin”. Ai shpjegoi se modeli që po përdoret është i ngjashëm me atë të Danimarkës dhe shpreson që numri i dëbimeve me forcë të jetë i ulët, pasi ofron stimulime financiare për kthimin vullnetar të migrantëve në vendin e tyre.
Në një intervistë për LBC, Streeting tha se ministrja e Brendshme, Shabana Mahmood, sigurohet që personat pa të drejtë qëndrimi të largohen sa më shpejt, por theksoi se qëllimi është mbështetja e zhvendosjes së re në mënyrë pa dhunë dhe jo përdorimi i forcës. “Numri i largimeve me forcë duhet të jetë i ulët,” deklaroi ai.
Nga ana tjetër, Kryeministri Edi Rama ka reaguar ashpër, duke akuzuar Mahmood për “stereotipizim etnik” ndaj shqiptarëve. Ai kritikoi faktin se qeveria britanike i ka veçuar 700 familjet shqiptare, duke e quajtur një veprim të papranueshëm për një qeveri të majtë.
Në një postim në platformën X, Rama shkruajti: “Si mundet një sekretar i brendshëm laburist të bëjë jehonë të djathtës ekstreme populiste dhe të veçojë 700 familje shqiptare? Ky është një shenjë e qartë e politikave të gabuara që e ekspozojnë shqiptarët ndaj rreziqeve dhe grupimeve ekstremiste.”
Ai shtoi se shqiptarët janë kontribues kryesorë në ekonominë britanike dhe paralajmëroi se trajtimi i tillë i tyre mund të rrezikojë sigurinë e vendit. Këto kërcënime kanë sjellë edhe shqetësime në Whitehall, ku zyrtarët po monitorojnë më shumë rrjetet e trafikut të migrantëve në Ballkan.
Presioni brenda qeverisë britanike po rritet, dhe disa deputetë laburistë kanë ngritur shqetësime, duke paralajmëruar se mund të ketë një revoltë të brendshme kundër politikës së dëbimeve.
Ndërkohë, tensionet mes Tiranës dhe Londrës po rriten, ndërsa politika britanike për azil të familjeve shqiptare po bëhet një nga çështjet më të diskutuara të kësaj kohe.
