Përfaqësuesja e Kosovës e mbylli me shkëlqim ciklin kualifikues të Botërorit, duke shënuar një arritje historike, kualifikimin në fazën Play-off të Kampionatit Botëror të vitit të ardhshëm. Sfida e fundit e Dardanëve u luajt në Prishtinë ndaj Zvicrës dhe u mbyll me rezultatin 1–1.
Megjithatë, ndeshja nuk kaloi pa tensione. Sa herë kapiteni i Zvicrës, Granit Xhaka, prekte topin, nga shkallët e stadiumit dëgjoheshin vërshëllima. Pas fundit të takimit, mesfushori shqiptar nuk e anashkaloi këtë episod, duke u shprehur i zhgënjyer.
“Jam i befasuar nga vërshëllimat. Më lënduan, por e pranoj. Përpiqem të fokusohem te loja—futbolli i ka edhe këto. Gjithmonë kam pasur mbështetjen e tifozëve zviceranë, si në shtëpi ashtu edhe në transfertë,” – tha Xhaka.
Ai shtoi se Zvicra ka arsye të forta për të qenë krenare, “Kualifikimi në një turne të madh për herë të tetë radhazi është diçka e veçantë. Ishte shumë e rëndësishme të mos ndikonim nga presioni i ndeshjes ndaj Kosovës.”
Xhaka foli edhe për aspektin psikologjik të sfidës: “Nuk është e lehtë të luash një ndeshje të tillë kur e di se një gabim mund të të kushtojë gjithçka, edhe pse gjashtë gola ishin shumë për t’i pësuar. Dominuam në pjesën e parë, shënuam në fillim të së dytës, por Kosova rriti presionin dhe barazoi. Në tërësi zhvilluam një fushatë eliminatore shumë të mirë.”
