Ariu i murrmë, specie e mbrojtur me ligj në Shqipëri, i cili prej 7 ditësh kishte rënë në një çark në pyjet e fshatit Xhafaj në Tepelenë, ka ngordhur.
Pas publikimit të videos në JOQ ALBANIA, ku shihej qartë gjendja e rëndë e arit të kapur në kurth, shërbimet e Stacionit të Policisë Memaliaj u drejtuan në vendin e quajtur “Thanzë”, pranë fshatit Xhafaj dhe aty konstatuan ariun e ngordhur.
Ai ishte kapur në këmbë nga një çark, i dyshuar se është vendosur nga banorë të zonës me qëllim mbrojtjen e të mbjellave dhe bagëtive nga kafshët e egra.
Specialistët për Hetimin e Krimeve po kryejnë veprimet e nevojshme hetimore në vendngjarje dhe po vijojnë procedurat për identifikimin e personave përgjegjës.
Ariu i murrmë është një specie e rrezikuar në Shqipëri, dhe gjuetia apo kapja e tij përbën vepër penale sipas ligjit për faunën e egër dhe biodiversitetin.
