Një plagosje me armë zjarri ndodhi mbrëmjen e kaluar në Shkodër ndaj shtetasit Edison Tirana, 42 vjeç. Dy autorët e arrestuar, Gjovalin dhe Pëllumb Gjekaj nga fshati Pjetroshan i Malësisë së Madhe, dyshohet se kanë qëlluar me armë automjetin e Tiranës dhe më pas e kanë goditur me sende të forta, ndërsa nipi i tyre është shpallur në kërkim.
Ngjarja ka nisur fillimisht në doganën e Hanit të Hotit për një debat pas parakalimeve mes automjeteve. Në afërsi të rrethrrotullimit të Koplikut, autorët dyshohet se kanë qëlluar në pjesën e pasme të makinës tip “Mercedes Benz” të Tiranës, i cili ka humbur kontrollin dhe është përplasur me bordurën e një karburanti.
Pas aksidentit, Edison Tirana u përpoq të fshihej në një tokë aty pranë, por autorët e gjetën dhe e goditën, duke i shkaktuar dëmtime trupore. Ai u paraqit në spital rreth orës 19:30 dhe ndodhet jashtë rrezikut për jetën. Hetimet për zbardhjen e plotë të ngjarjes vijojnë.
