Detaje të reja kanë dalë nga hetimet për vrasjen e 27-vjeçarit shqiptar Sulo Halili, trupi i të cilit u gjet i ekzekutuar dhe i karbonizuar në një makinë në zonën e Skourtës më 8 nëntor. Autoritetet greke e konsiderojnë rastin si një ndër më të ndërlikuarit e viteve të fundit, pasi skenarët e krimit kanë ndryshuar disa herë. Një pistë e re hetimi sugjeron se Halili mund të jetë ngatërruar me një tjetër shqiptar me të njëjtin emër dhe mbiemër, i cili njihej për precedentë penalë, ndërsa viktima nuk kishte asnjë lidhje me botën e krimit.
Hetuesit po verifikojnë edhe mundësinë e një konflikti personal, pasi sipas të dhënave paraprake, ish-partneri i të dashurës së Halilit dyshohet se mund ta ketë kërcënuar më herët. Gjithashtu, policia po analizon komunikimet e tij në rrjetet sociale, ku 27-vjeçari ishte në kontakt prej muajsh me një vajzë që mund ta ketë shkuar të takonte ditën e zhdukjes. Telefonat e viktimës dhe familjarëve janë sekuestruar dhe mesazhet në TikTok e platformat e tjera po analizohen për të rindërtuar lëvizjet e tij të fundit.
Një detaj kyç në hetim është edhe automjeti i djegur, i cili rezulton i vjedhur në maj në Glyfada dhe mbante targa të falsifikuara. Kjo, sipas policisë, sugjeron përfshirjen e një rrjeti të krimit të organizuar. Hetuesit dyshojnë se 27-vjeçari mund të jetë vrarë në një vend tjetër dhe më pas është transportuar në zonën e braktisur ku u dogj automjeti, ndërsa motivet dhe autorët mbeten ende të paidentifikuar.
