Në vetëm pak sekonda, një urë e sapo ndërtuar në Kinë u shndërrua në rrënoja. Pamjet nga provinca Sichuan tregojnë momentin kur ura “Hongqi” shembet si letër, ndërsa struktura gjigante e betonit zhytet në lumë mes një reje të dendur pluhuri.
Ura, e cila ishte hapur vetëm disa muaj më parë, u shemb pas një rrëshqitjeje masive të dheut, duke treguar fuqinë e frikshme të natyrës dhe brishtësinë e ndërhyrjes njerëzore përballë saj.
Ngjarja ndodhi më 11 nëntor, rreth mesditës me orën lokale, në qytetin Maerkang të provincës Sichuan. Sipas autoriteteve, shembja u shkaktua nga rrëshqitje masive dhe plasaritje të terrenit përreth, të cilat kishin paralajmëruar se diçka nuk shkonte që një ditë më parë.
Në mënyrë të pabesueshme, fatmirësisht nuk ka viktima, pasi ura ishte mbyllur për qarkullim një ditë më parë, pas zbulimit të një plasaritjeje 10 centimetra dhe shenjave të paqëndrueshmërisë në shpatet pranë saj. Kjo ndërhyrje e hershme rezultoi shpëtimtare, duke parandaluar një tragjedi të madhe.
Pamjet e filmuara tregojnë momentin e shembjes, kur mali rrëshqet ngadalë, më pas betoni dhe hekurat shkatërrohen njëri pas tjetrit, duke krijuar një re gjigante pluhuri që mbulon gjithë zonën.
Ura Hongqi, me një gjatësi prej 758 metrash, ishte pjesë e një autostrade të rëndësishme që lidhte Sichuan me rajonin e Tibetit. Ajo u përfundua këtë vit nga kompania “Sichuan Road & Bridge Group”, e cila tani ndodhet nën hetim për të zbuluar nëse shembja lidhet vetëm me terrenin apo edhe me ndonjë mangësi në projektim dhe ndërtim.
Kjo ngjarje ka ngritur sërish shqetësime për cilësinë e infrastrukturës në disa provinca kineze, sidomos në zonat malore, ku ndërthurja e terrenit të paqëndrueshëm me kushte ekstreme atmosferike po shfaqet si një kombinim fatal. Vetëm pak muaj më parë, një urë hekurudhore në provincën Qinghai u shemb gjatë punimeve, duke shkaktuar 12 viktima.
Në një botë ku ambicia njerëzore kërkon të sfidojë natyrën, ngjarje si kjo na kujtojnë se, pavarësisht shkencës dhe teknologjisë, natyra mbetet gjithmonë më e fortë, dhe se kujdesi e përgjegjësia në ndërtim janë po aq të rëndësishme sa guximi për të ndërtuar.
