Qytetarët që udhëtojnë dhe përdorin çdo ditë rrugën dytësore Tiranë-Vorë e dinë se trafiku në këtë aks është i papërballueshëm dhe shumë kaotik.
Për shkak të gjendjes së amortizuar të rrugës, por edhe fluksit të lartë, trafiku që krijohet çdo ditë është kilometrik.
Por disa shoferë të paduruar përpiqen “t’i bëjnë bisht” këtij trafiku duke u futur kundravajtje, duke shkelur rregullat e qarkullimit rrugor por edhe rrezikuar jetën e drejtuesve të tjerë.
Në një denoncim të fundit të mbërritur në redaksinë tonë, mund të shihni se si një automjet bëhet burim aksidenti duke u futur në parakalim shumë pranë rreth rrotullimit, ndërkohë që përdorte edhe celularin.
Qytetari që ka denoncuar këtë rast dhe për pak shmangu aksidentin e përplasjen kokë më kokë me mjetin në fjalë, i bën thirrje policisë për kontrolle dhe monitorime të shtuara në këtë aks pasi raste të tilla ndodhin çdo ditë.
