Një vit më parë, banorët e Thumanës dhe fshatrave të zonës protestuan për ditë të tëra duke kërkuar hyrje dhe dalje në autostradën e re Thumanë-Kashar.
Ata arritën me shumë mund që këtë të drejtë ta fitojnë, dhe protestat u ndërprenë vetëm pasi një përfaqësi e tyre zhvilloi takim me ministren e infrastrukturës Belinda Balluku e cila u premtoi akses në autostradë.
Aksesi i hyrjes është atje ku autostrada bashkohet me rrugën e vjetër, ndërsa dalja është në Gramzë dhe bëhet me anë të këtij mbikalimi.
Një vit pas këtyre ngjarjeve, rruga që bën daljen nga autostrada është lënë në kushte katastrofike. Gropat e thella disa centimetër e bëjnë thuajse të pamundur qarkullimin e automjeteve, ndërsa qytetarët përballen çdo ditë me këtë problem që institucionet nuk duan ta shohin dhe dëgjojnë.
Teksa folën për “TVA News”, shoferët shprehën shqetësimet e tyre për situatën e krijuar.
“Këtu bëhet katastrofë! Vetëm që të kalojmë nga autostrada dhe të paguajmë taksën e bëjnë. Ky është shteti më i korruptuar në botë,” tha një shofer.
Një tjetër zotëri shtoi: “Rruga është skandal! Se ku i çojnë paratë që marrin asnjë nuk e di. Rruga është me keq se në xhungël.”
Një shofer kamioni tregoi vështirësitë e përditshme, duke thënë se makinat po u prishen, dhe shpenzimet e dëmeve po u mbahen nga paga e tyre.
“Medet që jemi shoferë në këtë lloj rruge, shikoje. Edhe po na e vendosin në ngarkim kompanitë çdo gjë që prishim për faj të rrugës dhe na ngelet faji ne. Pse t’u prish? Pse e prishe? Na thonë neve. Kjo është e vetmja dalje, s’ke ku del tjetër. Kjo do asfalt jo inerte koti,” shprehet kamionisti.
Një tjetër tha: “Kjo ka në këtë gjendje që kur është hapur. Po këpusim balestra dhe jastëkë çdo ditë. Nuk e rregullojnë se lekët i ka marrë tuneli më duket. Thirrja ime është për autoritetet: Të marrin masa për ta bërë me asfalt. Është bërë 400 milion euro ajo para, edhe këtu për 50 mijë euro e lënë kështu.”
Tashmë mbetet për t’u parë nëse rruga do të rregullohet, apo institucionet do të vazhdojnë të mos dëgjojnë zërin e qytetarëve.
Shkrimi u mor nga TVA News!
