Gjykata e Apelit në Tiranë ka refuzuar kërkesën e Gjon Shkambit për lirimin nga paraburgimi, duke konfirmuar masën e arrestit të caktuar nga Shkalla e Parë. Shkambi kishte apeluar këtë vendim, duke pretenduar se nuk është autori i krimit që tronditi vendin me vrasjen e gjyqtarit Astrit Kalaja dhe plagosjen e dy personave të tjerë gjatë një procesi gjyqësor.
Në ankim, Gjon Shkambi argumentoi se nuk kishte dijeni për veprimet e nipit të tij, Elvis Shkambit, i cili qëlloi me armë ndaj gjyqtarit Kalaja menjëherë pasi ky lexoi vendimin kundër kërkesës së tij në një konflikt pronësie. Elvis Shkambi, 30 vjeç, ndodhet gjithashtu në paraburgim për ngjarjen e rëndë.
Ndryshe nga Gjon Shkambi, nipi i tij nuk ka apeluar vendimin e gjykatës dhe nuk ka kërkuar ndryshim të masës së sigurisë, duke qëndruar kështu në paraburgim deri në përfundimin e hetimeve dhe procesit gjyqësor.
