Këto pamje vijnë nga kryqëzimi i ish-Stacionit të Trenit në Tiranë, ku dhjetëra shoferë kanë mbetur të bllokuar në trafik për orë të tëra.
Sipas raportimeve të qytetarëve, në vendngjarje nuk është parë asnjë punonjës i Policisë Rrugore për të menaxhuar situatën.
Në video shihet se si automjetet kanë mbushur të gjithë kryqëzimin, duke pamundësuar çdo lëvizje, ndërkohë që radha e trafikut shtrihet deri në pjesën e bulevardit të ri. “Janë bërë tre orë kështu, nuk vjen asnjë polic të lirojë trafikun!”, shkruan një qytetar i irrituar.
Kjo nuk është zona e vetme e kryeqytetit që është përballur me trafik të rënduar mbrëmjen e sotme. Situata të ngjashme janë raportuar edhe në Zogun e Zi dhe në disa akse të tjera kryesore të Tiranës.
Trafiku është një nga problemet më të mëdha të banorëve të Tiranës, i cili në kohë me shi bëhet edhe më i rënduar se zakonisht.
