Tre priftërinj në Greqi janë arrestuar nën akuzën e trafikut të drogës, pasi dyshohet se kanë bashkëpunuar me dy shqiptarë, një burrë dhe një grua, të cilët drejtonin grupin kriminal. Hetimet e Agjencisë Kundër Drogës treguan se droga fshihej brenda një kishe në Rrugën Liosion dhe në oborrin e një kishe tjetër.
Njëri prej priftërinjve, 46-vjeçar, ruante dhe shiste drogë brenda kishës, duke dalë herë pas here në rrugë i veshur me rrobat e tij për t’ua shitur klientëve. Prifti i dytë, 40-vjeçar, u kap në Rodos me një valixhe që përmbante 2.2 kilogramë kokainë, të cilën ia dorëzoi më pas një shqiptari 38-vjeçar. Prifti i tretë, 25-vjeçar, ndodhet në paraburgim që nga 6 shtatori për transportim të paligjshëm të migrantëve.
Gjatë operacionit policia sekuestroi 2.2 kg kokainë, 9 kg marijuanë, 4 automjete, 4,400 euro dhe 25 mijë lekë shqiptare.
