Arch Kennedy, ish-meteorolog dhe autor amerikan, rrëfen historinë e tij të pazakontë për mënyrën si jeta e tij ndryshoi rrënjësisht pas një takimi shpirtëror me Jezusin. Ai thotë se dikur jetonte si homoseksual dhe vuante nga varësia ndaj alkoolit, por besimi e nxori nga errësira ku ndodhej.
Kennedy, autor i librit “The Weather’s Fine: My Method for Navigating Life’s Challenges”, u rrit në një familje të krishterë, por me kalimin e viteve u largua nga vlerat fetare. “Prindërit më mësuan vlerat e krishtera, por gjatë të 20-ave dhe 30-ave u zhyta në alkool dhe në një mënyrë jetese që më largoi plotësisht nga Zoti,” tregon ai.
Gjithçka nisi të ndryshonte kur motra e tij e ftoi të merrte pjesë në një grup studimi biblik në Atlanta. “Në fillim s’kisha dëshirë, por më pas vendosa të shkoj. Ishte hera e parë që e studioja me të vërtetë Fjalën e Zotit,” rrëfen Kennedy. “Aty ndjeva se Fryma e Shenjtë po punonte në mua, duke më treguar qartë mëkatet e mia.”
Ai thotë se pikërisht gjatë atyre momenteve nisi përplasja mes besimit dhe prirjeve të tij seksuale. “Për shumë vite u mundova t’i pajtoja të dyja, të isha i krishterë dhe njëkohësisht të vazhdoja marrëdhënie me meshkuj. Por kuptova se kjo ishte e pamundur. Nuk mund të ndiqja Krishtin dhe njëkohësisht të vazhdoja të njëjtën jetë,” shprehet ai.
Kennedy thotë se vendosi të jetojë në celibat, duke e parë këtë si thirrjen që Zoti i kishte caktuar. “Nuk mund ta ndryshoja tërheqjen time, por mund të ndryshoja si veproja. Zoti më thirri drejt pastërtisë dhe bindjes ndaj Tij,” shton ai.
Sot, ai është në rikuperim nga varësia ndaj alkoolit dhe thotë se ka gjetur paqen që dikur i mungonte. “Tani e dua Zotin më shumë se kënaqësitë e botës. Ai më ka dhënë forcën për të përballuar çdo tundim,” tregon Kennedy.
Ai shpreson që historia e tij të frymëzojë edhe të tjerët që përballen me dilema të ngjashme. Rrugëtimin e plotë e ka rrëfyer në librin e tij “The Weather’s Fine: My Method for Navigating Life’s Challenges.”
