Rrëfimi i Alec Penstone, një veteran 100-vjeç britanik i Luftës së Dytë Botërore, ka prekur dhe tronditur opinionin publik në Mbretërinë e Bashkuar. Deklaratat e tij, plot zhgënjim dhe reflektim, janë bërë virale pasi ai tha se “fitorja në Luftën e Dytë Botërore nuk ia vlejti”, duke vënë në pikëpyetje gjendjen aktuale të vendit për të cilin dikur luftoi.
Penstone, i cili braktisi punën në fabrikë për t’u bashkuar me Marinën Mbretërore dhe për të luftuar për lirinë e Anglisë, kujtoi sakrificat e mijëra bashkëluftëtarëve të tij që humbën jetën në beteja. “Shikoj me sytë e mendjes varret e bardha të miqve të mi dhe pyes veten: për çfarë sakrifikuan? Për këtë vend që kemi sot? Jo, më vjen keq, por nuk ia vlejti,” u shpreh ai me emocione, duke lënë pa fjalë moderatorët Adil Ray dhe Kate Garraway.
Kur u pyet të sqaronte më tej deklaratën e tij, veterani shtoi me një ton të hidhur: “Ne luftuam për lirinë, por tani është shumë më keq se atëherë.”
Deklaratat e Penstone erdhën në një moment kur Mbretëria e Bashkuar po përballet me ndarje të thella shoqërore dhe rënie të ndjenjës së krenarisë kombëtare. Një sondazh i fundit nga Ipsos dhe King’s College London tregon se tetë në dhjetë britanikë ndihen të ndarë si komb, një rritje prej dhjetë pikësh krahasuar me vitin 2020. Vetëm 46% e qytetarëve shprehen se janë krenarë për vendin e tyre, ndërsa pesë vite më parë kjo shifër ishte 56%.
Në reagimet pas sondazhit, ish-ministri konservator Michael Gove fajësoi “imigracionin masiv” për ndjenjën e përçarjes, duke theksuar se ndryshimet e shpejta demografike po tronditin identitetin e përbashkët britanik. “Kur kultura kombëtare perceptohet si e kërcënuar, shoqëria fillon të copëzohet,” tha Gove.
Nga ana tjetër, deputeti i Reform UK, Lee Anderson, akuzoi sistemin arsimor dhe qeveritë e kaluara për rënien e patriotizmit. “Të rinjtë po humbasin ndjenjën e përkatësisë, ndërsa shumë britanikë nuk mund të përballojnë më as shtëpi për vete,” u shpreh ai.
Sipas sondazhit, 48% e britanikëve dëshirojnë që vendi “të jetë si dikur”, një rritje e fortë nga 28% në vitin 2020. Madje, edhe të rinjtë e moshës 16–24 vjeç shfaqin gjithnjë e më shumë nostalgji për të kaluarën pothuajse dyfish më shumë se pesë vite më parë.
Fjalët e 100-vjeçarit Penstone pasqyrojnë një ndjenjë të thellë zhgënjimi, jo vetëm për realitetin aktual, por edhe për drejtimin që po merr shoqëria britanike. Për shumëkënd, rrëfimi i tij është një thirrje për reflektim mbi sakrificat e brezave të kaluar dhe mbi vlerat që, sipas tij, po humbasin çdo ditë e më shumë.
