Mbrëmja e sotme solli rikthimin e reshjeve të shiut në vend, por bashkë me to u rikthyen edhe problemet e njohura prej vitesh me furnizimin me energji elektrike.
Mjaftuan vetëm disa minuta shi që ndriçimi i autostradës Durrës–Fier të ndërpritet plotësisht, duke e lënë rrugën në errësirë totale. Të vetmet drita që u panë sonte në këtë aks ishin ato të fenerëve të automjeteve që qarkullojnë në rrugë.
Një qytetar që sapo ka mbërritur nga jashtë dhe po udhëtonte drejt Fierit e përshkruan situatën me fjalët: “Është turpi i Zotit.” Në mesazhin e tij për redaksinë tonë, ai shkruan: “Autostrada e Durrësit komplet errësirë. Edhe rruga nuk shifet, turp i madh do vriten njerëz. Është turp i Zotit, sa kemi ardhur nga jashtë dhe po ikim për Fier, por është katastrofë.”
Pamjet nga vendngjarja e konfirmojnë situatën, pasi rruga është pothuajse e padukshme, ndërsa rreziku për aksidente mbetet i lartë në kushte të tilla udhëtimi. Thirrja shkon për autoritetet mbikëqyrëse që kanë për detyrë mbarëvajtjen e qarkullimit në këtë rrugë: Merrni masa sa më parë për rikthyer ndiçimin dhe shmangur aksidentet.
