Seanca e sotme plenare në Kuvend u shoqërua me një moment humoristik, teksa kryetari i Kuvendit, Niko Peleshi, ngatërroi deputetin e opozitës Belind Këlliçi me ministren Belinda Balluku, e cila është aktualisht nën hetim nga SPAK për çështjen e tunelit të Llogarasë.
Teksa opozita kërkonte praninë e Ballukut në sallë, Peleshi iu drejtua Këlliçit me fjalët:
“Për procedurë zoti Balluku, zoti Këlliçi.”
Momenti shkaktoi të qeshura në sallë, ndërsa deputetët e pranishëm reaguan me batuta ndaj lapsusit të Peleshit.
Ngatërresa ndodhi në një seancë të tensionuar, ku çështja e Belinda Ballukut dominoi diskutimet parlamentare. Opozita kërkoi që ajo të ishte e pranishme për t’u përballur me pyetjet e deputetëve pas vendimit të SPAK-ut për ta marrë të pandehur.
