Një qytetar ka dërguar një video në redaksinë e JOQ Albania, ku shihet një automjet që ka humbur kontrollin dhe ka përfunduar mbi bordurën ndarëse të rrugës në Kamëz, pranë shkollës “Angela Merkel”.
Ngjarja ka ndodhur mbrëmjen e së martës, rreth orës 21:40. Për fat të mirë, në momentin e aksidentit rruga ka qenë bosh dhe nuk ka persona të lënduar.
Qytetari që dërgoi videon apelon për më shumë kujdes nga drejtuesit e automjeteve:
“Shoferët janë bërë shumë të papërgjegjshëm, nuk dinë as drejt të ecin, vetëm i gjuajnë bordurave. Mund të kishte ndodhur tragjedi nëse rruga do kishte njerëz. Nëse nuk je për timon, mos e merr makinën, se mund të humbasësh një jetë, edhe pa dashje. Ju lutem, bëni kujdes sepse raste të tilla po shtohen çdo ditë.”
Pamjet e dërguara tregojnë makinën të ngjitur mbi ndarësen e rrugës, me dëme të dukshme materiale. Siç shprehet qytetari, mrekulli që askush nuk u lëndua nga aksidenti.
