Një tjetër skandal ushqimor ka dalë në dritë në kryeqytet. Mandarina të spërkatura me insekticidin e ndaluar periphos methyl (i njohur si acticllic) janë shitur në supermarketet e Tiranës, ndërkohë që Autoriteti Kombëtar i Ushqimit (AKU) vijon të heshtë edhe pse kanë kaluar pesë ditë nga publikimi i rezultateve laboratorike.
Ky preparat, i ndaluar për përdorim në fushat bujqësore, lejohet vetëm për dezinfektimin e depove apo magazinave ushqimore. Megjithatë, në Shqipëri është përdorur për të spërkatur fruta që kanë mbërritur direkt në tryezat e qytetarëve.
Burime laboratorike nga Instituti i Sigurisë Ushqimore dhe Veterinare (ISUV) kanë konfirmuar se mandarinat e tregtuara përmbanin gjurmë të insekticidit periphos methyl, një përbërës i rrezikshëm që dyshohet se shkakton kancer, dëmton sistemin nervor dhe mund të shkaktojë përgjumje, acarim të rrugëve të frymëmarrjes dhe dëmtime të organeve të brendshme.
Pavarësisht kësaj, AKU dhe Ministria e Bujqësisë nuk kanë bërë asnjë deklaratë publike për sasinë e produktit që ka qarkulluar në treg apo për origjinën e tij — nëse mandarinat janë shqiptare apo të importuara.
Eksperti i bujqësisë, Shpend Shahini, deklaron se nëse fermerët e kanë përdorur gjatë vegjetacionit, përgjegjësia bie edhe mbi specialistët bujqësorë dhe farmacitë agroushqimore që duhet t’i udhëzojnë për përdorimin e duhur të preparateve.
“Ky insekticid është i ndaluar për përdorim në pemë dhe mund të përdoret vetëm për produkte në ruajtje. Nëse është përdorur në fushë, atëherë kemi dështim të plotë të zinxhirit të kontrollit dhe informimit,” – tha Shahini.
Ndërkohë, qytetarët kanë konsumuar pa dijeni një produkt që Bashkimi Europian e ka ndaluar prej vitesh për shkak të efekteve të rënda në shëndet. Rasti i mandarinave helmuese nxjerr edhe njëherë në pah mungesën e kontrollit në tregun ushqimor dhe vë në pikëpyetje sigurinë ushqimore në vend, ndërsa institucionet përkatëse vijojnë të qëndrojnë në heshtje.
