Një zbulim i pazakontë dhe tronditës është bërë në Shpellën e Kopiles, në Leskovik, ku janë gjetur mbetje kockore të dyshuara si njerëzore.
Sipas informacioneve paraprake, mbetjet janë zbuluar gjatë një ekspedite nga disa qytetarë shqiptarë në brendësinë e shpellës, në një thellësi që shkon mbi 100 metra. Kockat janë gjetur në zonën e liqenit termik, i cili u bë i njohur disa muaj më parë pas eksplorimit nga një grup speleologësh çekë.
Ngjarja është raportuar menjëherë në polici, e cila ka nisur hetimet dhe ka ngritur grupin hetimor për sqarimin e rrethanave. Fillimisht është bërë sigurimi i vendit të ngjarjes, ndërsa hetimet po vijojnë në bashkëpunim me Prokurorinë e rrethit gjyqësor të Korçës.
Ekspertë të kriminalistikës pritet të kryejnë analiza laboratorike për të përcaktuar nëse mbetjet i përkasin një ose më shumë personave, si dhe kohën e mundshme të dekompozimit.
