Zëvendëskryeministrja dhe Ministrja e Infrastrukturës dhe Energjisë, Belinda Balluku, është paraqitur këtë të premte në ambientet e SPAK, ku është marrë në pyetje për rreth 40 minuta në lidhje me një çështje që ndodhet nën hetim nga Prokuroria e Posaçme.
Pas daljes nga godina e institucionit, Balluku foli shkurt për gazetarët, duke konfirmuar se ishte thirrur nga SPAK dhe se kishte pranuar të jepte shpjegimet e kërkuara “në respekt të organeve të drejtësisë”.
“Në respekt të organeve të drejtësisë kam pranuar kërkesën e SPAK për një çështje në hetim. Si zyrtare publike e shoh si një proces që jam shpresëplotë që do të jetë i bazuar në llogaridhënie dhe parimet e drejtësisë,” – deklaroi Balluku.
Zëvendëskryeministrja nuk dha detaje mbi natyrën e hetimit apo çështjen konkrete për të cilën është thirrur, duke theksuar se procesi është në fazë verifikimi dhe se respekton plotësisht institucionet e drejtësisë.
Ndërkohë, mësohet se Balluku është përfaqësuar nga avokatja Pamela Qirko, e cila është motra e saj dhe ish-kryetare e Komisionit të Pavarur të Kualifikimit (KPK).
SPAK nuk ka dhënë ende asnjë reagim zyrtar lidhur me arsyet e thirrjes së zëvendëskryeministres.
