Një burrë nga India ka tërhequr vëmendjen e botës me historinë e tij të jashtëzakonshme. Ai thuhet se fle deri në 300 ditë në vit, për shkak të një çrregullimi të rrallë neurologjik të quajtur Aksis Hipersomnia.
42-vjeçari Purkharam nga Rajasthan po përballet me këtë gjendje të pazakontë prej më shumë se 20 vitesh. Kur bie në gjumë, ai është pothuajse i pamundur për t’u zgjuar, familja e tij detyrohet ta ushqejë, ta lajë dhe madje ta ndihmojë të përdorë tualetin, ndërsa ai vazhdon të jetë në gjumë.
Zakonisht, Purkharam fle për periudha që zgjasin nga 20 deri në 25 ditë rresht. Por edhe pasi zgjohet, ai ndjehet i lodhur dhe vuan nga dhimbje të forta koke. Në ditët e rralla kur është zgjuar, mesatarisht vetëm pesë ditë në muaj, ai arrin të hapë për pak orë dyqanin e tij të vogël ushqimor.
Me kalimin e viteve, gjendja e tij është përkeqësuar, por familja ende shpreson se një ditë Purkharam do të mund të kthehet në një jetë normale.
Sipas Institutit Kombëtar të Çrregullimeve Neurologjike në SHBA (NINDS), hipersomnia shkakton përgjumje të thellë që nuk lehtësohet as pas gjumit, duke e bërë tepër të vështirë për personat e prekur të qëndrojnë zgjuar, të fokusuar dhe aktivë gjatë ditës.
