Vetëm disa ditë pas disfatës historike në shtëpi ndaj Shqipërisë me rezultatin 0-1 në Leskovc, Federata e Futbollit të Serbisë ka nisur menjëherë lëvizjet për të zëvendësuar Dragan Stojkoviç “Piksi”, i cili dha dorëheqjen menjëherë pas ndeshjes.
Sipas mediave serbe, drejtuesit e FSS kanë arritur një marrëveshje verbale me Veljko Paunoviç, ish-trajnerin që në vitin 2015 udhëhoqi kombëtaren U-20 drejt titullit kampion bote në Zelandën e Re.
Presidenti i Federatës, Dragan Xhajiç, dhe sekretari i përgjithshëm, Branko Radujko, kanë marrë konfirmimin e Paunoviçit, ndërsa zyrtarizimi pritet të bëhet brenda pak ditësh. “Siç qëndrojnë gjërat tani, Veljko Paunoviç është trajneri i ri i Serbisë. Shanset janë 90%”, shkruan e përditshmja Kurir, duke cituar burime pranë Federatës.
Humbja ndaj Shqipërisë, me golin e Rei Manajt në fundin e pjesës së parë, ka shkaktuar një tronditje të fortë në futbollin serb. Mediat vendase e kanë cilësuar këtë rezultat si “një nga më të dhimbshmet në historinë moderne” të kombëtares, duke e kthyer fitoren kuqezi në një moment kthese që pritet të shënojë fundin e epokës Stojkoviç dhe fillimin e një ere të re me Paunoviç në krye.
