Ditët e fundit, sporti shqiptar është përfshirë nga një debat i pazakontë që ka në qendër volejbollisten braziliane të Dinamos, Nayara Ferreira. Pas ngritjes së dyshimeve për gjininë e saj, sportistja është pezulluar nga aktivitetet, ndërsa Federata Shqiptare e Volejbollit i ka kërkuar të nënshtrohet një testi për përcaktimin e gjinisë.
Ngjarja ka marrë përmasa të mëdha në rrjetet sociale, ku opinionet janë ndarë mes atyre që e mbështesin Ferreirën dhe të tjerëve që kërkojnë “qartësi” nga institucionet sportive.
Në një reagim, Nayara Ferreira e cilësoi situatën si “të tmerrshme dhe të padrejtë”, duke theksuar se nuk do të lejojë që paragjykimet ta rrëzojnë. Ajo u shpreh se është “thjesht një vajzë që ka të drejtë të jetë vetvetja” dhe se do të vazhdojë të luftojë për dinjitetin dhe vendin e saj në sport.
Rasti i saj ka hapur një diskutim më të gjerë mbi mënyrën se si trajtohen sportistët në situata të tilla dhe mbi respektimin e identitetit gjinor në sportin shqiptar, një temë që, deri më sot, ishte pothuajse e panjohur në arenën vendase.
