Qarkullimi i mjeteve në drejtim të Greqisë dhe anasjelltas është ndërprerë që në orët e para të mëngjesit, për shkak të një greve katërorëshe të punonjësve të doganave greke. Sipas informacioneve nga Drejtoria Rajonale e Kufirit, greva ka shkaktuar bllokim të plotë të kalimit të automjeteve në të dy anët e kufirit, ndërsa lëvizja e këmbësorëve vijon normalisht. Greva pritet të përfundojë rreth orës 10:00 të paradites.
Pavarësisht njoftimit të Policisë Kufitare të Kakavijës për ndalimin e mjeteve gjatë periudhës kohore 06:00–12:00, në pikën kufitare janë krijuar radhë të gjata automjetesh. Shumë udhëtarë janë shprehur se nuk ishin në dijeni për grevën, ndërsa disa prej tyre janë mashtruar nga agjencitë e udhëtimit, të cilat i kanë siguruar se lëvizja e autobusëve do të zhvillohej normalisht.
Sipas burimeve greke, doganierët kanë ndërmarrë grevën si formë proteste për kërkesën e tyre për rritje page. Autoritetet kufitare shqiptare kanë bërë me dije se gjatë kohës së grevës lejohen të kalojnë vetëm këmbësorët pa bagazhe dhe automjetet me raste emergjente shëndetësore.
