Banorët e fshatit Remenj në Pogradec kanë ngritur shqetësimin për gjendjen e degraduar të rrugës kryesore që lidh zonën me qytetin. Një prej banorëve ka bërë apel publik duke kërkuar që autoritetet vendore të ndërhyjnë sa më shpejt. “Ju lutem, shikoni gjendjen e rrugës kryesore në Remenj të Pogradecit, pa asnjë investim. Ju lutem, postojeni,” shkruan ai në mesazhin e tij.
Rruga, sipas banorëve, është e dëmtuar prej vitesh dhe gjatë stinës së shirave bëhet pothuajse e pakalueshme. Përveç vështirësive në lëvizjen e automjeteve, problemet shtohen edhe për nxënësit dhe të moshuarit që e përdorin për nevoja të përditshme. Ata thonë se kanë bërë disa herë kërkesa në bashki, me kryetar Ilir Xhakolli por deri më tani nuk kanë marrë asnjë përgjigje konkrete.
Banorët e Remenjit shpresojnë që denoncimi i tyre i dërguar në JOQ Albania të dëgjohet dhe të përfshihet në planet e investimeve publike. Ata kërkojnë që rruga të asfaltohet ose të bëhet të paktën e kalueshme, duke theksuar se infrastruktura e mirë është jetike për zhvillimin e zonës dhe për mbajtjen e popullsisë në fshat.
