Një operacion i zhvilluar nga policia e Korçës ka çuar në pranga një 53-vjeçar, i cili u kap në aksin rrugor Kapshticë–Bilisht duke transportuar mallra të kontrabanduara nga Greqia.
Gjatë kontrollit, në mjetin që ai drejtonte u gjetën pajisje të ndryshme hidrosanitare dhe elektrike, për të cilat dyshohet se kishin hyrë në territorin shqiptar në mënyrë të paligjshme.
Ndërkohë, në lidhje me këtë rast është proceduar penalisht edhe një doganier i vendpunimit në Pikën e Kalimit Kufitar të Kapshticës, i dyshuar për neglizhencë në ushtrimin e detyrës.
Policia bën me dije se ka sekuestruar mallrat, me vlerë rreth 2000 euro, së bashku me automjetin e 53-vjeçarit.
