Java e kaluar nisi me një urdhër të rreptë nga ministrja Koçiu: skuterat ndalohen deri në njoftim të dytë. Arsyeja? Për të “rregulluar” përdorimin e mjeteve elektrike. Në teori, një vendim për sigurinë publike. Në praktikë, një tjetër skenë groteske e shtetit shqiptar në veprim.
Menjëherë pas urdhrit, policia rrugore doli në rrugë me një zell që s’e sheh as kur ka kriminelë në kërkim. Çdo skuter u ndalua, çdo qytetar u trajtua si të kishte kaluar kufirin me drogë, dhe çdo mjet u sekuestrua me krenari të madhe, sikur të kishin kapur ndonjë nga figurat e botës së krimit.
Por, si zakonisht, rregullat janë vetëm për ata pa uniformë.Një qytetar ka denoncuar se, ndërsa njerëzve i sekuestruan skutera për “shkelje ligjore”, punonjësit e policisë rrugore shkojnë në punë me të njëjtat skutera. Po, ato që eprorja e tyre i ndaloi me urdhër zyrtar!
Në Shqipëri, ligji nuk është më një normë, është një kostum që e vesh kush e ka me porosi. Një polic rrugor me skuter “të ndaluara” është vetëm një ilustrim i vogël i një sistemi ku hipokrizia është më e qëndrueshme se ligji vetë.
Në fund të fundit, ndoshta ministrja Koçiu kishte të drejtë: skutera janë të rrezikshëm. Sidomos kur i ngasin ata që janë “mbi ligjin”.
