Një ngjarje e rëndë ka tronditur mëngjesin e sotëm zonën e Manzës në Durrës, ku një konflikt i çastit për një kafe degjeneroi në përplasje me armë, duke lënë pas dy viktima të rinj.
Personi në foto është 23-vjeçari Aranit Kurti, i cili sipas burimeve paraprake po qëndronte në një lokal së bashku me mikun e tij Daniel Pepa, 21 vjeç. Ky i fundit i kërkoi kamerierit t’i përgatiste një kafe, por kërkesa e tij nuk u plotësua pasi ekspresi i kafesë ishte i fikur.
Në këtë moment, në debat ndërhyri Flori Paluçi, 33 vjeç, i cili po qëndronte në lokal në të njëjtën kohë me kamerierin. Përplasja verbale mes tyre u përshkallëzua me shpejtësi, derisa Paluçi nxori armën dhe qëlloi ndaj Aranit Kurtit, duke e lënë të vdekur në vend.
Pas vrasjes së Kurtit, shoku i viktimës, Daniel Pepa, reagoi menjëherë duke qëlluar me armë ndaj Paluçit dhe e vrau atë në vendngjarje.
Policia e Durrësit mbërriti në vendngjarje, duke sekuestruar armët e përdorura dhe duke nisur hetimet për zbardhjen e plotë të ngjarjes që i mori jetën dy të rinjve.
