Detaje të reja janë zbardhur nga konflikti i nisur për një kafe në një lokal në Maznë të Durrësit dhr që përfundoi me dy të rinj të vrarë.
Shtatë persona janë shoqëruar nga policia, ndërsa një 21-vjeçar është shpallur në kërkim, pasi dyshohet si protagonisti kryesor i ngjarjes së rëndë.
Sipas dëshmisë së kamerierit në lokal, gjithçka ka nisur kur 21-vjeçari Daniel Pepa ka hyrë në lokal dhe ka kërkuar një kafe. Kamerieri i ka thënë se ekspresi ishte fikur dhe duhej disa minuta për t’u ngrohur, por Pepa ka refuzuar të largohej dhe është ulur në tavolinë me Aranit Kurtin, duke e ofenduar dhe duke insistuar që t’i shërbehej kafeja.
Në mbrojtje të kamerierit ka ndërhyrë 33-vjeçari Flori Paluçi, i cili ndodhej aty dhe i ka kërkuar Pepës të respektojë punonjësin. Situata është tensionuar dhe pas një debati verbal, Paluçi ka nxjerrë armën dhe ka qëlluar ndaj Aranit Kurtit, i cili ka humbur jetën në vend.
Pas këtij akti, Daniel Pepa është larguar drejt makinës së tij, ka marrë një armë dhe është kthyer duke qëlluar drejt Paluçit, i cili gjithashtu ka ndërruar jetë nga plagët.
“Daniel Pepa dhe Araniti kanë ardhur në lokal rreth orës 1-1.30 dhe ka kërkuar kafe. I thashë që s’ka kafe se ekspresi është fikur. Ai më tha se donte kafe patjetër, po i thashë që është fikur e s’bëhet në këtë orë.
Ai u acarua dhe në këtë moment ndërhyri Flori, për të më dalë në krah dhe nisi debati mes tyre. Nga lokali dolën te dera e lokalit dhe Flori Paluçi qëlloi mbi Aranitin, shokun e Danielit dhe Danieli më pas ka marrë armën dhe ka qëlluar mbi Florin duke e lënë të vrarë”- tregon kamerieri.
Policia vijon hetimet dhe ka shoqëruar shtatë persona të tjerë për të sqaruar rrethanat e ngjarjes. Ndërkohë, kërkimi për Daniel Pepën vazhdon intensivisht.
