Bizhuteritë e çmuara të kurorës franceze që u vodhën në Luvre

Sipas autoriteteve, tetë bizhuteri u vodhën gjatë grabitjes, përfshirë diadema (kurora të zbukuruara me gurë të çmuar), varëse, vathë dhe brosha.

Të gjitha datojnë nga shekulli i 19-të dhe dikur i përkisnin familjeve mbretërore dhe perandorake franceze.

Ministria e Kulturës e Francës ka publikuar listën e sendeve të vjedhura:

• Një tiarë dhe një broshë që i përkisnin Perandoreshës Eugénie, bashkëshortes së Napoleonit III
• Një varëse smeraldi dhe një palë vathësh smeraldi nga Perandoresha Marie Louise
• Një tiara, varëse dhe një vath i vetëm nga seti me safir që i përkiste Mbretëreshës Marie-Amélie dhe Mbretëreshës Hortense
• Një broshë e njohur si “brosha relikë” (reliquary brooch)

Këto bizhuteri janë të zbukuruara me mijëra diamante dhe gurë të tjerë të çmuar.

Sipas hetuesve, kurora e Perandoreshës Eugénie u gjet e dëmtuar pranë rrugës së arratisjes, me gjasë pasi grabitësit e kishin lënë pas gjatë ikjes.

Ministri i Brendshëm Laurent Nuñez i përshkroi bizhuteritë e vjedhura si “të paçmueshme” dhe me “vlerë trashëgimie të pallogaritshme”.

“Kemi një garë me kohën tani,” tha Chris Marinello, drejtori ekzekutiv i organizatës Art Recovery International.

Sipas tij, kurorat dhe diademat mund të copëtohen lehtë dhe të shiten pjesë-pjesë.

“Grabitësit nuk do t’i mbajnë të paprekura,” shpjegoi Marinello. “Ata do t’i çmontojnë, do të shkrijnë metalet e vlefshme, do të riprocesojnë gurët dhe do të fshehin çdo gjurmë të krimit.”

Ai shtoi se do të jetë e vështirë t’i shesin bizhuteritë në gjendjen e tyre origjinale.

Më herët gjatë këtij viti, zyrtarët e Luvrit i kishin kërkuar ndihmë qeverisë franceze për të restauruar dhe rinovuar sallat e ekspozitave, si dhe për të përmirësuar sigurinë e veprave të artit.

Në atë kohë, Presidenti Emmanuel Macron kishte premtuar se Luvri do të ridizenjohej si pjesë e projektit “Rilindja e Re (New Renaissance)”, me një kosto mes €700 dhe €800 milionë, që përfshin edhe forcimin e masave të sigurisë.