Segmenti rrugor që lidh fshatin Vlosht të bashkisë Roskovec me fshatin Allambrez në bashkinë Dimal është kthyer prej vitesh në një “rrugë të harruar”. Banorët e zonës e përshkruajnë si “rruga e Zotit”, pasi, sipas tyre, asnjë institucion nuk ka marrë përsipër mirëmbajtjen apo rregullimin e saj.
Asfalti mungon prej kohësh, gropat janë bërë pjesë e përditshmërisë, ndërsa në ditët me shi rruga shndërrohet në baltë dhe pellgje, duke e bërë thuajse të pakalueshme për automjetet dhe këmbësorët. Për shumë familje që jetojnë përgjatë këtij aksi, udhëtimi drejt qytetit është bërë një sfidë e përditshme.
Problemi qëndron në faktin se rruga ndodhet në kufirin administrativ mes dy bashkive, Roskovec dhe Dimal, dhe asnjëra nuk ka marrë përgjegjësinë për ta mirëmbajtur. Çdo palë e konsideron “jashtë territorit të saj”, duke lënë banorët në mes të premtimeve të pambajtura dhe harresës institucionale.
Ndërkohë, rruga mbetet simbol i mungesës së bashkëpunimit midis institucioneve vendore dhe i mënyrës sesi përgjegjësitë shpesh kalojnë nga njëra palë te tjetra, ndërsa qytetarët mbeten të vetmit që vuajnë pasojat.
