Arbër Hoxha po jeton një periudhë të artë në karrierën e tij. Sulmuesi i Kombëtares shqiptare është shndërruar në një nga emrat më të spikatur të Dinamos së Zagrebit dhe tashmë edhe të fanellës kuqezi, ku vetëm pak ditë më parë gjeti rrugën e rrjetës për herë të parë.
Pas këtij momenti historik me Shqipërinë, 25-vjeçari ka marrë edhe një tjetër shpërblim personal, është shpallur “Lojtari i Muajit” në kampionatin kroat, një vlerësim që konfirmon formën e shkëlqyer që po kalon.
Në 9 ndeshjet e para të sezonit, Hoxha ka realizuar 2 gola dhe ka dhënë 2 asiste, duke marrë gjithashtu nota të larta në çdo paraqitje. Me një mesatare vlerësimi 7, ai është tashmë ndër futbollistët më të vlerësuar të ligës, duke dëshmuar se dinamika e tij në fushë dhe kontributi në lojën sulmuese po bëhen gjithnjë e më vendimtarë si për klubin, ashtu edhe për Kombëtaren.
