Dhoma e Avokatisë së Shqipërisë ka vendosur bojkot të përgjithshëm të të gjitha proceseve penale në vend, në shenjë proteste ndaj arrestimit të avokatit Ulian Barjami. Vendimi, i marrë unanimisht nga Komiteti Drejtues i Dhomës së Avokatisë dhe i firmosur nga kryetari Prof. Dr. Maksim Haxhia, parashikon ndërprerjen e pjesëmarrjes së avokatëve në çdo seancë penale , si në fazën e hetimit, ashtu edhe në gjykim , për periudhën 20 deri më 25 tetor 2025.
Sipas vendimit, përjashtim bëjnë vetëm çështjet që lidhen me masat e sigurimit personal, si caktimi, ndryshimi, zëvendësimi apo shuarja e tyre. Dhoma ka theksuar se mospjesëmarrja e avokatëve gjatë kësaj periudhe është arsye objektive për shtyrjen e të gjitha seancave gjyqësore.
Dokumenti zyrtar paralajmëron se moszbatimi i vendimit do të konsiderohet shkelje e rëndë disiplinore dhe mund të çojë deri në pezullim ose heqje licence për avokatët që nuk respektojnë bojkotin. Komiteti Drejtues ka kërkuar reagim urgjent nga Inspektori i Lartë i Drejtësisë, Këshilli i Lartë Gjyqësor dhe Këshilli i Lartë i Prokurorisë, duke e cilësuar arrestimin si një ngjarje “tepër të rëndë” dhe një “cënim serioz të pavarësisë së profesionit të avokatit”.
Në të njëjtën kohë, Dhoma ka vendosur të shtyjë tryezën e planifikuar me Ministrinë e Drejtësisë për datën 20 tetor, që kishte në fokus diskutimin mbi Projekt Kodin Penal. Vendimi është dërguar për zbatim në të gjitha Dhomat Vendore të Avokatisë dhe do të depozitohet zyrtarisht pranë gjykatave dhe institucioneve të drejtësisë.
Avokati Ulian Barjami u arrestua më 17 tetor 2025 gjatë një seance gjyqësore në Gjykatën e Juridiksionit të Përgjithshëm në Elbasan, ku po mbante mbrojtjen e shtetasit Maksim Suçi. Arrestimi ndodhi pas një incidenti gjatë të cilit Barjami dyshohet se kërcënoi prokurorin dhe duke vënë në dyshim vlefshmërinë e një prove video të paraqitur nga prokuroria, duke pretenduar se ajo ishte në kundërshtim me procesverbalin e hartuar nga prokurori i çështjes, Gjergji Ceka.
Dhoma e Avokatisë kërkon që ky rast të shqyrtohet me urgjencë, duke theksuar rëndësinë e mbrojtjes së pavarësisë së profesionit dhe të sigurisë së avokatëve në ushtrimin e detyrës së tyre.
