Një aktivist që prej vitesh kishte kundërshtuar hapur politikat e Vladimir Putinit është gjetur i vrarë në Turqi, vend ku jetonte prej disa vitesh nën identitet të rremë. Trupi i Abakar Abakarov, themelues i kanalit në Telegram Morning Dagestan, u zbulua nga një pastrues në një vilë me qira në Stamboll.
Sipas policisë turke, 49-vjeçari kishte plagë të shumta me thikë dhe ishte zhdukur prej më shumë se një jave. Abakarov kishte ikur nga Rusia pasi autoritetet e shpallën në kërkim ndërkombëtar, duke e akuzuar për nxitje të protestave antiqeveritare në Dagestan.
Në vitin 2023, ai kishte raportuar për trazirat në aeroportin e Makhachkalasë, ku një turmë protestuesish sulmoi objektin dhe u përlesh me policinë, duke lënë dhjetëra të plagosur. Burime lokale raportojnë se Abakarov kishte marrë me qira vilën më 6 tetor dhe, të nesërmen, ishte parë me një vizitor që u largua me dy çanta.
Trupi i pajetë u gjet një ditë më pas, pa dokumente identifikimi. Policia turke ka hapur hetim për vrasjen, ndërsa autoritetet nuk kanë dhënë ende detaje mbi autorët apo motivet e mundshme.
