Gazetari investigativ italian Sigfrido Ranucci, ka qenë objekt i kërcënimeve për vite me radhë, përfshirë edhe atentate të planifikuara ndaj jetës së tij dhe familjes. Ai ndodhet nën mbrojtje që nga viti 2021, ndërsa kujdesi ndaj tij ka nisur që në vitin 2009.
Mbrojtja filloi pas një investigimi që Ranucci realizoi në Sicili për një minierë të menaxhuar nga një klan katanez. Familja Ercolano kishte kërkuar që gazetari të mbikëqyrej nga një person i rrezikshëm.
Në vitin 2021, niveli i alarmit u rrit ndjeshëm. “Që nga mesi i gushtit jam nën mbrojtje 24 orë në 24. Një person nga burgu kishte punësuar dy vrasës të huaj, dy shqiptarë, për të më vrarë. Ky individ menaxhon trafikun e drogës dhe ka lidhje me familje të ‘Ndranghetas, si dhe me kartelin kolumbian të Pablo Escobar”, tregoi Ranucci për revistën Noi Antimafia.
Porositësi i atentatit është ende në burg, por nuk është hapur proces penal ndaj vrasësve të mundshëm. Sipas gazetarit, i njëjti rreth kriminal lidhet edhe me vrasjen e bosit të njohur Fabrizio Piscitelli, i njohur si Diabolik.
Ranucci kujtoi edhe kërcënime të tjera gjatë viteve, përfshirë një plan për ta vrarë nga një përfaqësues i klanit Santapaola në vitin 2010, që u pengua nga Matteo Messina Denaro. Në nëntor 2024 ai u kërcënua pas raportimeve për konfliktin Izrael-Palestinë.
Gazetari ka marrë kërcënime të vazhdueshme, duke përfshirë gjetjen e dy plumbave jashtë shtëpisë dhe ndjekje nga persona të identifikuar nga eskorta e tij. Megjithatë, Ranucci vazhdon punën investiguese, duke sfiduar kërcënimet dhe duke zbuluar lidhjet midis krimit të organizuar dhe politikës.
