Në Peru pritet të shpallet gjendja e jashtëzakonshme, pasi një person humbi jetën dhe dhjetëra të tjerë, përfshirë 89 policë dhe 22 civilë, mbetën të plagosur gjatë protestave të dhunshme kundër presidentit të ri José Jerí, vetëm pak ditë pasi ai mori detyrën.
Protestat shpërthyen në kryeqytetin Lima, ku mijëra persona, kryesisht të rinj, punëtorë transporti dhe grupe civile, u përplasën me policinë para ndërtesës së Kongresit, mes thirrjeve kundër korrupsionit dhe pasigurisë në vend. Policia përdori gaz lotsjellës, ndërsa protestuesit hodhën gurë dhe bomba molotov.
Një 32-vjeçar, Eduardo Mauricio Ruiz, mbeti i vrarë gjatë përleshjeve. Zyra e Prokurorisë konfirmoi se ai u qëllua me armë, ndërsa autoritetet kanë nisur hetimet për rrethanat e ngjarjes.
Presidenti Jerí shprehu keqardhje për vdekjen e Ruizit, por fajësoi “elementë të dhunshëm që u infiltruan në protestën paqësore për të përhapur kaos”, duke paralajmëruar se “ligji do të bjerë me gjithë forcën e tij mbi ta”.
Qeveria pritet të miratojë masa të reja për sigurinë publike, përfshirë reformën e sistemit penitenciar dhe të policisë kombëtare. Megjithatë, qeveria e Jerít po përballet me mosbesim të madh publik, pasi vetë presidenti është akuzuar më herët për korrupsion dhe sulm seksual, çështje që ai i ka mohuar dhe deklaruar se do të bashkëpunojë me drejtësinë.
Ish-presidentja Dina Boluarte, e rrëzuar javën e kaluar pas protestave masive, kishte po ashtu një mbështetje shumë të ulët, me vetëm 2–4% miratim, ndërsa Kongresi aktual gëzon gjithashtu vlerësime minimale nga publiku.
Gjendja e jashtëzakonshme në Lima pritet të shpallet brenda orëve, mes tensioneve të larta dhe frikës për përshkallëzim të dhunës në ditët në vijim.
