Një qytetare nga Pogradeci ka ngritur një shqetësim serioz mbi kushtet skandaloze në të cilat ndodhet materniteti i qytetit. Në një denoncim të bërë në redaksinë tonë, ajo e përshkruan situatën si të papranueshme dhe alarmante për një institucion shëndetësor që kujdeset për jetën e nënave dhe fëmijëve të porsalindur.
Sipas qytetares, materniteti i Pogradecit është në një gjendje të degraduar, me mure të lagura, suva të rëna, tualete jashtë funksionit dhe mungesë të theksuar higjiene.
Duke treguar pamjet tronditëse nga ambientet e brendshme të maternitetit, qytetarja pyet se si mund të futet një shtet në BE kur materniteti dhe spitalet janë në këtë gjendje.
Ndërkohë, mungesa e investimeve në spitale dhe maternitetet rajonale mbetet një plagë e vjetër e sistemit shëndetësor në vend, duke lënë mijëra qytetarë të ekspozuar ndaj kushteve të papërshtatshme për trajtim dhe lindje.
Qytetarja kërkon ndërhyrje të menjëhershme nga Ministria e Shëndetësisë, drejtoria rajonale dhe institucionet përgjegjëse për inspektimin e standardeve spitalore.
Denoncimi i qytetares:
"Pershendetje! Shikoni ke cfare gjendje eshte materniteti ne qytetin e Pogradecit. Si mund te lihet ne kete menyre ne gjendje katastrofike ,pa higjiene minimale dhe shteti pretendon te hyje ne BE"
